Brú yfir Mjóafjörð

Hafin er vinna við þriðju og síðustu brúna inni í Ísafjarðardjúpi. Brúin yfir Mjóafjörð er jafnframt sú lengsta af brúnum þremur eða um 127,7 metra löng og því ríflega helmingi stærri en brúin yfir Reykjafjörð. Unnið er að því að fleyga berg og jafna undir landstöpla.

Að sögn Sveins Inga Guðbjörnssonar er búið að flytja aðstöðuna úr Reykjafirði, skúra, tæki og efni, yfir í Mjóafjörð og því ekkert að vanbúnaði að hefjast handa við stöplana um leið og jarðvinnu lýkur svo framarlega sem ekki verði að gera hlé á verkinu vegna veðurs.

Skemmdarvargar í nýbyggingu Grunnskólans

Í gær voru framin skemmdarverk í nýbyggingu Grunnskólans á Ísafirði og er það ekki í fyrsta skipti sem slíkt gerist. Að sögn Garðars Sigurgeirssonar, verkstjóra hjá Vestfirskum Verktökum, farið var inn í bygginguna seinni partinn í gær og perur brotnar og plast rifið. Svipuð atvik hafa átt sér stað um þrisvar til fjórum sinnum og fyrir um það bil þremur vikum síðan var tjónið það mikið að lögreglan var kölluð til og skýrsla gefin um málið. Þá voru dýrar gasperur brotnar og tjónið nam um 100 þúsund krónum.

„Það er erfitt að verja þetta því við erum með plast í öllum gluggum og því auðvelt fyrir óprúttna að komast inn. Eftir 2 vikur koma gluggarnir og þá hættir þetta líklega. Hér er nú engu spennandi að stela, þannig að þetta eru hreinlega bara skemmdarverk. Það er enginn á vakt að staðaldri en við erum að einhverju leyti tryggðir fyrir svona.

Mig grunar að þetta séu krakkar, en þetta er ákaflega hvimleitt því það þarf oft ekki nema tvo til að skemma fyrir hinum, þau hafa að öðru leyti verið til fyrirmyndar,“ segir Garðar.

Tekið af bb.is

Miklar framkvæmdir hjá Gámaþjónustu Vestfjarða

Verið er að leggja lokahönd á framkvæmdir við starfsstöð Gámaþjónustu Vestfjarða að Kirkjubóli 3 í Skutulsfirði, en verið er að gera húsnæðið klárt til að endurvinnsla geti farið þar fram. „Við höfum verið að taka húsið í gegn undanfarin tvö ár og ég á von á því að síðasti smiðurinn ljúki sér af í dag“, segir Ragnar Ágúst Kristinsson, framkvæmdastjóri Gámaþjónustunnar....

Brúargólfið í Reykjafirði

Brúargólfið í Reykjafirði var steypt um helgina og tók verkið um 30 tíma. Gólfið er 60 metra langt og  fóru 370 rúmmetrar af steypu í það. Menn voru ánægðir með hvað verkið gekk vel miðað við að það skiptust á skin og skúrir í Reykjafirðinum og var vinnusvæðið eitt forarsvað. Ágúst Atlason vefhönnuður og áhugaljósmyndari mætti á staðinn og tók meðfylgjandi myndir.