Vestfirskir buðu lægst

Vestfirskir verktakar ehf., átti lægsta tilboð í þakviðgerðir á húsnæði Dvalarheimilisins Hlífar á Ísafirði. Þrjú fyrirtæki buðu í verkið, GÓK-húsasmiðiði, Ísblikk og Vestfirskir verktakar. Öll fyrirtækin skiluðu inn tveimur tilboðum, annars vegar fyrir aluzink þakefni og hins vegar fyrir litað bárujárn. Tilboð Vestfirskra verktaka var lægst í báðum tilfellum. Bæjarráð hefur samþykkt að gengið verði til samninga við lægstbjóðanda.
Tekið af bb.is

Jón Þorláksson lætur af störfum

Jón Þorláksson múrari hefur starfað hjá Vestfirskum verktökum allt frá stofnun fyrirtækisins í lok árs 2003. Nonni lét af störfum sökum aldurs á dögunum og var af því tilefni kvaddur með pompi og prakt á kaffistofu Vestfirskra.

Það væri ólíkt Nonna að ætla sér að fara að liggja með tærnar upp í loft og eru margvísleg verkefni framundan hjá honum á komandi sumri á milli þess sem hann mun þeysast landshornanna á milli með tjaldvagninn í eftirdragi. Um leið og Vestfirskir verktakar þakka Nonna fyrir vel unnin störf óska þeir honum alls hins besta.

Þakið á Selabóli tyrft

Unnið var að því á dögunum að tyrfa þak hússins að Selakirkjubóli í Önundarfirði og líður nú senn að því að íbúðarhúsið verði klárt til innflutnings.

Rífandi gangur við Mjólkárvirkjun

Vestfirskir verktakar vinna nú að stækkun stöðvarhúss Mjólkárvirkjunar. Fyrsta skóflustungan var tekin í byrjun apríl og miðar verkinu vel að sögn Sveins Inga sem hefur yfirumsjón með verkinu.