Tækniþjónusta Vestfjarða og Vestfirskir verktakar styrkja Raggagarð

Vestfirskir verktakar afhentu í dag Vilborgu Arnarsdóttur frumkvöðli að Raggagarði, fjölskyldugarðs Vestfjarða í Súðavík, lykla af salernishúsi sem smíðað var fyrir garðinn. Sveinn Lyngmó hjá Tækniþjónustu Vestfjarða hannaði húsið og Vestfirskir Verktakar smíðuðu það. Húsið var klárað rétt fyrir áramót og var flutt til Súðavíkur á þrettándanum.

Tækniþjónusta Vestfjarða og Vestfirskir Verktakar styrktu Raggagarð alfarið um hönnun og smíði. Húsið verður svo fest niður á réttan stað um leið og vorar. Raggagarður var opnaður formlega í ágúst en hann er staðsettur í ytri byggð Súðavíkur.

(Tekið af bb.is)

Hús Raggagarðs

Reisugil salernishússins sem á að standa í Raggagarði var haldið á milli jóla og nýárs. Vilborg færði starfsmönnum Vestfirskra að sjálfsögðu Boggukleinur með kaffinu, en þeir gáfu alla vinnu sína við smíði hússins.

Íbúðir afhentar í Bræðratungu

Vestfirskir verktakar afhentu nýjum eigendum fyrstu tvær íbúðirnar á Skógarbraut 3 og 3a í Bræðratungu á föstudag. Umræddar íbúðir eru 93 fermetrar hvor, á einni hæð með baðstofulofti. Eftir er að ganga frá sex íbúðum í húsunum tveimur í Bræðratungu, á bilinu 90 til 150 fermetrar að stærð, sem enn eru óseldar. Verðmæti íbúðanna fer, að sögn Hermanns Þorsteinssonar hjá Vestfirskum verktökum, mikið eftir því á hvaða stigi fólk vill taka við þeim. Einnig segir Hermann að einn bílskúr sé til sölu í Bræðratungu, sem lítið eigi eftir að gera í og gæti því afhenst með skömmum fyrirvara.

Skógarbraut 3 og 3a eru í hlíðinni ofan við golfvöllinn, og var þar rekið sambýli og þjónustumiðstöð fyrir fatlaða í tvo áratugi, en verktakar hafa unnið að breytingum á húsinu um nokkurt skeið.

(Tekið af bb.is)

Framkvæmdir við iðnaðarhús á Langeyri ganga vel

Framkvæmdir við byggingu tveggja iðnaðarhúsa á Langeyri sem Vestfirskir verktakar byggja fyrir Súðavíkurhrepp eru á áætlun. „Verkið hefur gengið vel, við erum búnir að setja stálgrindurnar upp og erum nú að hefjast handa við setja upp einingarnar. Að því loknu verður farið í framkvæmdir innandyra í öðru húsinu sem mun hýsa áhaldahús hreppsins og slökkviliðsstöð en enn er óákveðið undir hvað hitt húsið verður nýtt“, segir Garðar Sigurgeirsson hjá Vestfirskum verktökum. Iðnaðarsvæði hefur verið skipulagt á Langeyri sem er skammt innan við íbúabyggðina í Súðavík. Verkinu á að vera lokið 1. október og segir Garðar að það eigi að standast.

(Tekið af bb.is)