Þorsteinn í hremmingum...

Eins og sjá má á meðfylgjandi mynd lenti starfsmaður okkar Þorsteinn Guðbjartsson í miklum hremmingum er hann var á leið til vinnu í síðast liðinni viku, er BMW bifreið hans kastaðist út af veginum með þeim afleiðingum að hún sat pikkföst í vegarkantinum og þurfti að kalla út allt tiltækt björgunarlið til að koma honum upp á veginn aftur.

Ekki fylgdi sögunni hvað olli þessu tjóni en sá sem þetta ritar telur ekki ólíklegt að hér hafi verið um vítavert gáleysi ökumanns að ræða.

Hafnarbúðin afhent formlega

Hafnarbúðin var í morgunn formlega afhent eigendum sínum eftir umfangsmiklar breytingar og endurbætur. Bæði hefur verslunarrýmið verið stækkað auk þess sem Skóverslun Leós, áður til húsa að Hafnarstræti 5, flutti starfsemi sína í nýju Hafnarbúðina.
Óhætt er að segja að vel hafi tekist til með breytingarnar og eigendur ánægðir með hvernig til tókst. Af gefnu tilefni færði Hermann B. Þorsteinsson fyrir hönd Vestfirskra verktaka þeim Ingu S. Ólafsdóttur og Kristjáni Jóhannssyni blóm og fagurlega útskorinn platta til minningar um framkvæmdirnar og óskir um að verslunin og viðskiptin megi blómstra í framtíðinni.
Í Hafnarbúðinni er meðal annars að finna vörur frá 66°Norður, Cintamani og Adidas svo fátt eitt sé nefnt.

Fulltrúar Samskipa í heimsókn

Kristín Hálfdánsdóttir rekstrarstjóri Samskipa á Ísafirði og Guðjón Þ. Guðmundsson viðskiptastjóri innanlandsdeildar Samskipa brugðu undir sig betri fætinum í dag og litu í heimsókn á skrifstofu Vestfirskra verktaka. Þau komu færandi hendi með síðbúin dagatöl full af girnilegum mataruppskriftum, titanium penna og minnisblokkir sem koma sér svo sannarlega vel. Viljum við þakka þeim kærlega fyrir komuna og okkur.

Stefnt að því að afhenda Edinborgarhúsið um sjómannadagshelgina

Stefnt er að því að afhenda Edinborgarhúsið á Ísafirði í kringum sjómannadagshelgina, en framkvæmdir við lokaáfanga hússins ganga vel. „Það er farið að líða á seinni hálfleik í framkvæmdunum og þetta hefur gengið vel“, segir Hermann Þorsteinsson, framkvæmdastjóri verktakafyrirtækisins Vestfirskra verktaka sem hefur verkið í höndum. „Þarna verður meðal annars 100 sæta veitingastaður en ekki er búið að semja við neinn um reksturinn og er hér með lýst eftir rekstraraðilum....