Gólfplötur steyptar fyrir nýtt skólahúsnæði

Síðastliðinn fimmtudag steyptu Vestfirskir verktakar gólfplötu í nýju skólahúsnæði Grunnskólans á Ísafirði. Gólfplatan er rúmir 1.000 fermetrar og í hana fara alls um 150 rúmmetrar af steypu.

Að sögn Garðars Sigurgeirssonar, húsasmíðameistara hjá Vestfirskum verktökum, gekk verkið eins og í sögu. „Þetta gekk rosalega vel og við kláruðum þetta á einum degi. Byrjuðum rétt fyrir átta um morguninn og vorum búnir um sjöleytið, svo þetta tók á milli 11 og 12 tíma“, segir Garðar. Þá segir hann verkið allt á áætlun ennþá. „Nú vonum við bara að haustið verði gott, það hefur mikið að segja.“

(Tekið af bb.is)

Steypuvinna hafin við Grunnskólann

Framkvæmdir eru komnar á fullt við byggingu nýs Grunnskóla á Ísafirði. Byrjað er að steypa sökkla og er kominn stór byggingarkrani á svæðið. Byggja á nýja tengibyggingu á milli nýja barnaskólans og þess gamla og mun því núverandi tengibygging víkja.

Einnig er áætlað að byggja viðbyggingu við gamla barnaskólann í áttina að húsinu sem áður hýsti verslunina Björnsbúð en hýsir nú hárgreiðslustofu og verslun á jarðhæð.

Vestfirskir verktakar voru lægstbjóðendur í verkið og sjá um framkvæmdina sem á að vera tilbúin haustið 2008. Þá er einnig að vera rífa upp Kaupfélagsplanið en það hefur verið leiksvæði grunnskólabarna undanfarin ár en gamalt malbik var á því ásamt því að það var steypt að hluta en helluleggja á planið og mun það áfram vera leiksvæði.

(Tekið af bb.is)

Endurbygging bensínstöðvarinnar á Ísafirði á áætlun

Vestfirskir verktakar ehf. hafa unnið bæði dag og nótt við endurbyggingu nýrrar bensínstöðvar á Ísafirði. Eins og gefur að skilja þá er verktími mjög knappur þar sem sumarið er háannatími bensínstöðva. Að sögn Hermanns Þorsteinssonar hjá Vestfirskum verktökum er verkið á áætlun og útlit fyrir að settum markmiðum verði náð.

Í vikunni var áfyllingarplan við bensíndælur steypt, dúkur lagður á þak og nú er verið að setja glugga í húsið. Bensínstöðina á að stækka í um 200 m² og færa hana í nútímalegt horf. Allar dælur verða endurnýjaðar, sjálfsali settur upp og skyggni reist yfir dælurnar.

(Tekið af bb.is)

Þriðja íbúðin í Bræðratungu seld

Vestfirskir verktakar undirrituðu á dögunum samning um sölu á þriðju íbúðinni að Skógarbraut 3 og 3a í Bræðratungu. Tvær íbúðir hafa verið afhentar er eftir er að ganga frá fimm íbúðum í húsunum tveimur í Bræðratungu. Þær eru á bilinu 90 til 150 fermetrar að stærð og eru óseldar.

Mikill áhugi er á íbúðunum, að sögn Hermanns Þorsteinssonar hjá Vestfirskum verktökum, en verðmæti þeirra fer mikið eftir því á hvaða stigi fólk vill taka við þeim. Skógarbraut 3 og 3a eru í hlíðinni ofan við golfvöllinn, og var þar rekið sambýli og þjónustumiðstöð fyrir fatlaða í tvo áratugi, en verktakar hafa unnið að breytingum á húsinu um nokkurt skeið.

(Tekið af bb.is)