VestVerk mótaröðin í pílukasti

Næst komandi föstudag verður haldið fyrsta mótið af fjórum í hinni árlegu VestVerk mótaröð í pílukasti þar sem starfsmenn Vestfirskra Verktaka munu spreyta sig í pílukasti. Búist er við góðri þátttöku hér eftir sem hingað til enda til mikils að vinna. Wurth á Íslandi hefur verið einn helsti (eini) styrktaraðili mótsins til þessa og mun ekki láta sitt eftir liggja að þessu sinni heldur og lofar veglegum sigurverðlaunum auk skammarverðlauna.

Vesturafl í nýtt húsnæði

Starfsendurhæfingarstöðin Vesturafl hefur flutt í nýtt húsnæði að Mánagötu 6a á Ísafirði. „Við erum alveg rífandi hamingjusöm með húsnæðið en það er stærra en það gamla og hentar betur undir starfsemina að mörgu leiti. Til að mynda er aðgengið betra þar sem við erum bara á einni hæð núna“, segir Harpa Guðmundsdóttir iðjuþjálfi hjá Vesturafli....

Lyftuhúsið langt á veg komið

Bygging lyftuhúss við Fjórðungssjúkrahúsið á Ísafirði er langt á veg komin. Það eru Vestfirskir verktakar á Ísafirði sem sjá um framkvæmdina. Búið er að reisa stillans við húsið og eru starfsmenn fyrirtækisins að vinna við frágang utanhúss. Ráðgert er að því verki verði lokið í þessari viku. Áætluð verklok eru í apríl og er verkið á áætlun.

Tekið af bb.is

Næst stærsta steypa aldarinnar á Vestfjörðum!

Brúargólf yfir Ósa í Bolungarvík var steypt síðastliðinn föstudag en það var næststærsta steypa aldarinnar en sú stærsta var brúin yfir Reykjafjörð sem steypt var síðastliðið sumar. Brúargólfið yfir Ósá er 32 metrar að lengd og 9,5 metri að breidd. Í gólfið fóru 264 rúmmetrar eða um það bil 44 steypubílar. Að sögn Garðars Sigurgeirssonar, yfirbrúarsmiðs gekk mjög vel, en það tók 12 menn 20 klukkutíma að steypa gólfið. Veður var fínt, smá éljagangur og verkið gekk eins og til stóð.